Kannt´ i aa bloß a bisserl guad singa, hatt´ i längst selber probiert, a Musikerkarriere zum ofanga. Aber meine Liadln ham fei scho as Zeig dazua, daß s´es auf die Bühnen derer Weit und in de Herzen vo de Leit schaffan! Z´wega dem bin i Liadl-Schreiber ´worn.

Zu meine wichtigsten musikalischen Einflüß´ kean Oidstars wia da Denver Johnny, Simon & Garfunkel, der Mey Reinhard, Bon Jovi, der Springsteen Bruce und R.E.M., aber aa Sänger wia der Blunt James, der Keith Toby und der Passenger, um bloß a paar aufzumzein. Aber i hab´ aa auf de kloaner Bühnen vo meiner Hoamatstodt Landshut schon vui Inspiration und Talent seng derfa. Da dabei hab´ i aa den groußen Benton Franz kennag´lernt, der mia rund ums Gitarrspuin und de Musi an sich ganz vui bei´bracht hod. 

So broad wia mei Musig´schmack is aa de Bandbroad´n bei meine eig´ner Liadln. I mog Folk- und Countrymusi, wei i gern G´schichten verzei und Botschaften in d´ Musi nei verpack´. Aber i hab´ aa richtig g´schmeidige Pop- und Rockliadln bis hi zu Stadionrock-Hymnen, de wo sofort ins Ohr gengan und aa lang dort bleim.

Mei Arbat is 3-sprachig, genau wia mei Homepage. Zum oana Englisch, wei mia englischsprachige Liadln scho oiwei g´foin ham, aber aa, wei i mi seit jeher vor oim Amerika recht sakrisch verbunden fui. Was des ogeht, schlagt mei Herz sicher zua Hälften amerikanisch. Zua anderen Hälften schlagt´s freilich boarisch, wei mia aa mein boarische Hoamat und seine Menschen b´sonders am Herzen lieng. Deshoib hab´ i aa an Haufa Liadln für boarische Sänger im Programm. A boarischer Spruch sagt: „mia kennan ois…außer hochdeitsch!“ Naja, so weit mechad i jetzt ned geh´, drum schreib´ i aa Liadln auf deitsch.